ເສດຖະກິດດີຈີຕອນອາຊຽນ ຄາດວ່າຈະສູງເຖິງ 1 ລ້ານໆໂດລາ

29

ເວັບໄຊສຳນັກຂ່າວ BNews.vn ລາຍງານວ່າ: ກອງປະຊຸມອາຊຽນ – ອິນໂດ – ປາຊີຟິກ ( AIPF ) ຈັດຂຶ້ນພາຍໃຕ້ຂອບກອງປະຊຸມສຸດຍອດອາຊຽນ ຄັ້ງທີ 43 ລະຫວ່າງວັນທີ 5 – 7 ກັນຍານີ້ ທີ່ນະຄອນຫຼວງຈາກາຕາ, ທ່ານ ໂຈໂກ ວິໂດໂດ ( Joko Widodo ) ປະທານາທິບໍດີຂອງດິນໂດເນເຊຍ ໄດ້ກ່າວວ່າ: ໃນທ່າມກາງເສດຖະກິດໂລກທີ່ອ່ອນແອ, ອາຊຽນ ໄດ້ສະແດງໃຫ້ເຫັນຄວາມອາດສາມາດໃນການປັບຕົວ ແລະ ສືບຕໍ່ພັດທະນາ ມີຄວາມເຕີບໂຕເກີນກວ່າອັດຕາເຕີບໂຕໂດຍລວມຂອງໂລກ ແລະ ພາກພື້ນອື່ນ ດ້ວຍຈໍານວນປະຊາກອນ 680 ລ້ານຄົນ ອາຊຽນຍັງເປັນຕະຫຼາດທີ່ມີສັກກະຍະພາບ ພ້ອມໂອກາດການລົງທຶນທີ່ມີຢ່າງຫຼາກຫຼາຍ.

ໃນວາລະ 2 ຂອງກອງປະຊຸມ AIPF ແມ່ນການຈັດຫາແຫຼ່ງເງິນທຶນທີ່ຍືນຍົງ ເຊິ່ງມີການປະເມີນວ່າອາຊຽນຕ້ອງການເງິນ 29,4 ລ້ານໆໂດລາ ສຳລັບການປ່ຽນແປງດ້ານພະລັງງານ ແລະ ຈໍາເປັນຕ້ອງມີແຜນການຈັດຫາເງິນທຶນຜ່ານການຮ່ວມມືທີ່ເປັນປະໂຫຍດ ແລະ ຍືນຍົງ.

ຂະນະທີ່ເລື່ອງການຫັນເປັນດີຈີຕອນ ແລະ ເສດຖະກິດທີ່ມີຫົວຄິດສ້າງສັນ ເຊິ່ງເປັນປະເດັນສຳຄັນສຸດທ້າຍຂອງ  AIPF, ທ່ານ ໂຈໂກ ວິໂດໂດ ກ່າວວ່າ: ເສດຖະກິດດີຈີຕອນຂອງອາຊຽນ ຄາດວ່າຈະສູງເຖິງ 1 ລ້ານໆໂດລາ ພາຍໃນປີ 2030 ແລະ ຈໍາເປັນຕ້ອງມີການປັບປຸງການນໍາເອົານະວັດຕະກຳດີຈີຕອນມາໃຊ້ ເພື່ອຮອງຮັບເສດຖະກິດສ້າງສັນ ຕະຫຼອດຮອດວິສາຫະກິດຂະໜາດກາງ ແລະ ຂະໜາດນ້ອຍ ລວມເຖິງຈຸນລະວິສາຫະກິດ.

ໄລຍະຜ່ານມາ, ອາຊຽນ ແລະ ຄູ່ຮ່ວມງານໄດ້ໃຊ້ງົບໄປແລ້ວ ລວມປະມານ 56 ຕື້ໂດລາ ໄປກັບ 93 ໂຄງການ ການຮ່ວມມື ແລະ 73 ໂຄງການດ້ານສັກກະຍະພາບ ໄດ້ສະແດງໃຫ້ເຫັນເຖິງຄວາມມຸ່ງໝັ້ນຂອງພວກເຮົາໃນການດຳເນີນການເພື່ອປ່ຽນອິນໂດປາຊີຟິກ ໃຫ້ເປັນພາກພື້ນທີ່ສະຫງົບສຸກ, ມັ່ງຄັ່ງ ແລະ ຈະເລີນຮຸ່ງເຮືອງ.

AIPF ຈັດຂຶ້ນຄັ້ງທໍາອິດ ໃນປີ 2019 ເພື່ອດຳເນີນການຕາມວິໄສທັດອາຊຽນ ສຳລັບອິນໂດປາຊີຟິກ ( AOIP ) ເຊິ່ງປ່ຽນຈາກການສຸມໃສ່ການຮ່ວມມືດ້ານຄວາມໝັ້ນຄົງຄັ້ງກ່ອນ ມາເປັນການຮ່ວມມືດ້ານເສດຖະກິດສະເພາະດ້ານ.