8 ເດືອນ ອຸດົມໄຊ ແກ້ໄຂລົດນຳເຂົ້າບໍ່ຖືກຕ້ອງ 575 ຄັນ ເກັບລາຍຮັບໄດ້ 46 ຕື້ກວ່າກີບ

31

 

8 ເດືອນປີ 2023 ແຂວງອຸດົມໄຊ ສາມາດແກ້ໄຂລົດນຳເຂົ້າບໍ່ຖືກຕ້ອງ 575 ຄັນ ເກັບລາຍຮັບໄດ້ 46 ຕື້ກວ່າກີບ. ສ່ວນແຜນໃນຕໍ່ໜ້າແມ່ນຈະໄດ້ສຸມໃສ່ໂຄສະນາເຜີຍແຜ່ ແລະ ເກັບກຳສະຖິຕິລົດທີ່ນຳເຂົ້າບໍ່ຖືກຕ້ອງ.


ທ່ານ ສຸລິຍາ ສຸພິທັກ ຫົວໜ້າພະແນກການເງິນແຂວງອຸດົມໄຊ ໄດ້ລາຍງານຄວາມຄືບໜ້າ ກ່ຽວກັບການຈັດຕັ້ງປະຕິບັດ ແກ້ໄຂລົດນຳເຂົ້າບໍ່ຖືກຕ້ອງຕາມກົດໝາຍຢູ່ແຂວງອຸດົມໄຊ ຕໍ່ກັບກອງປະຊຸມອົງການປົກຄອງແຂວງອຸດົມໄຊ ໃນວັນທີ 4 ກັນຍາ 2023 ວ່າ: ການຈັດຕັ້ງປະຕິບັດແກ້ໄຂລົດນໍາເຂົ້າບໍ່ຖືກຕ້ອງ ພວກເຮົາໄດ້ເອົາໃຈໃສ່ປະຕິບັດຕາມກົດໝາຍຢ່າງເຂັ້ມງວດ ໂດຍສະເພາະການປັບໃໝ, ການເຄື່ອນໄຫວລາດຕະເວນ, ລົງກວດກາຢູ່ບັນດາຮ້ານຂາຍລົດຕາມພາລະບົດບາດຂອງເຈົ້າໜ້າທີ່ພາສີ, ສົມທົບເຈົ້າໜ້າທີ່ຕຳຫຼວດໃນການກວດກາລົດຕາມທ້ອງຖະໜົນ, ເກັບກຳຂໍ້ມູນສະຖິຕິລົດນຳເຂົ້າບໍ່ຖືກຕ້ອງ ແລະ ເຜີຍແຜ່ໂຄສະນາຜ່ານສື່ຕ່າງໆ ເພື່ອໃຫ້ສັງຄົມທຸກພາກສ່ວນຮັບຊາບ ແລະ ເຂົ້າໃຈໃນການຈັດຕັ້ງປະຕິບັດ.


ຜ່ານການຈັດຕັ້ງປະຕິບັດຕົວຈິງ, ການແກ້ໄຂລົດນຳເຂົ້າບໍ່ຖືກຕ້ອງ ( ລົດເຖື່ອນ ) ພາຍຫຼັງທີ່ໝົດໄລຍະການຜ່ອນຜັນແຈ້ງເສຍພາສີ ແມ່ນໄດ້ເຂັ້ມງວດ ຕິດຕາມ, ກວດກາ, ດຳເນີນການເສຍພາສີຖືກຕ້ອງ ແລະ ສອດຄ່ອງຕາມກົດໝາຍກຳນົດ ແລະ ວາລະແຫ່ງຊາດກຳນົດໄວ້ຕາມຄຳສັ່ງຂອງທ່ານນາຍົກ ເລກທີ 20 ແລະ ຂໍ້ຕົກລົງຂອງແຂວງ ເລກທີ 132 ເຊິ່ງເລີ່ມແຕ່ວັນທີ 1 ມັງກອນ ຫາ ວັນທີ 31 ສິງຫາ 2023 ເຫັນໄດ້ວ່າ ຈໍານວນລົດທີ່ມາແຈ້ງເສຍພາສີ – ອາກອນທັງໝົດ 626 ຄັນ, ມີລົດທີ່ເສຍພາສີ – ອາກອນແລ້ວ ຈຳນວນ 587 ຄັນ ສາມາດຈັດເກັບລາຍຮັບໄດ້ທັງໝົດ 46,47 ຕື້ກີບ, ໃນນີ້ມີເງິນປັບໃໝ 21,48 ຕື້ກີບ.

ການແກ້ໄຂລົດນຳເຂົ້າບໍ່ຖືກຕ້ອງ ເຖິງແມ່ນວ່າເອົາໃຈໃສ່ແກ້ໄຂດ້ວຍຄວາມພະຍາຍາມສູງສຸດ ຈົນເຮັດໃຫ້ລາຍຮັບສູນກາງໄດ້ເກີນແຜນໃນ 8 ເດືອນ 45,21%, ແຕ່ສະພາບຕົວຈິງຍັງພົບເຫັນລົດນຳເຂົ້າມາບໍ່ຖືກຕ້ອງຍັງມີຫຼາຍ.
ສຳລັບລົດນຳເຂົ້າສ່ວນຫຼາຍແມ່ນນຳເຂົ້າໃນຮູບແບບນັກທ່ອງທ່ຽວ ນຳເຂົ້າທາງດ່ານສາກົນບໍ່ເຕັນ ແຕ່ເວລານຳອອກແມ່ນບໍ່ໄດ້ນຳອອກດ່ານທີ່ນຳເຂົ້າ ແຕ່ໄປອອກດ່ານສາກົນອື່ນ ( ບໍ່ອອກດ່ານຕົ້ນທາງທີ່ນຳເຂົ້າ ) ຈຶ່ງເຮັດໃຫ້ມີຄວາມຫຍຸ້ງຍາກໃນການສົມທຽບຂໍ້ມູນ, ການກວດກາຂອງເຈົ້າໜ້າທີ່ຕຳຫຼວດຢູ່ຕາມເສັ້ນທາງ ກໍລະນີພົບເຫັນລົດນຳເຂົ້າບໍ່ຖືກຕ້ອງ ແມ່ນບໍ່ສາມາດກັກ ຫຼື ຢຶດລົດດັ່ງກ່າວໄວ້ໄດ້.


ສຳລັບແຜນໃນຕໍ່ໜ້າ ແມ່ນຈະໄດ້ສຸມໃສ່ໂຄສະນາເຜີຍແຜ່ ແລະ ເກັບກຳສະຖິຕິລົດທີ່ນຳເຂົ້າບໍ່ຖືກຕ້ອງ, ພ້ອມທັງໃຫ້ແຕ່ລະເມືອງແຈ້ງຕໍ່ບ້ານເຜີຍແຜ່ ແລະ ເກັບກໍາຂໍ້ມູນ ພ້ອມທັງລະດົມໃຫ້ຜູ້ຄອບຄອງລົດນຳເຂົ້າບໍ່ຖືກຕ້ອງມາແຈ້ງເສຍຕາມກົດໝາຍ, ລະບຽບການ ແລະ ເວລາທີ່ກຳນົດໄວ້ ໄປຄຽງຄູ່ກັບການປະກາດແຈ້ງທາງວິທະຍຸ ແລະ ໂທລະໂຄ່ງ; ການຈັດຕັ້ງປະຕິບັດວຽກງານຕົວຈິງແມ່ນຈະໄດ້ແບ່ງອອກໄປ 2 ໄລຍະ ຄື: ໄລຍະທີ 1 ແມ່ນປະຕິບັດແຕ່ນີ້ຮອດວັນທີ 30 ກັນຍາ 2023 ແມ່ນແຂວງ ໄດ້ກຳນົດນະໂຍບາຍຜ່ອນຜັນໄປຄຽງຄູ່ກັບການເກັບກຳສະຖິຕິ ແລະ ໂຄສະນາເຜີຍແຜ່ ເພື່ອເປັນການປຸກລະດົມໃຫ້ຜູ້ຄອບຄອງລົດນຳລົດໄປເສຍພາສີດ້ວຍຄວາມສະໜັກໃຈ ແລະ ໄລຍະທີ 2 ແມ່ນຈະດຳເນີນມາດຕະການເຂັ້ມງວດ, ເດັດຂາດ ດ້ວຍການຢຶດລົດມາຮິບໂຮມໄວ້ ແລະ ທັງດຳເນີນຄະດີຕໍ່ຜູ້ຄອບຄອງລົດຕາມກົດໝາຍ ແລະ ລະບຽບການ.
ສຳລັບການແກ້ໄຂລົດທີ່ນຳເຂົ້າໃນຮູບແບບນັກທ່ຽວທ່ຽວແມ່ນຈະເຂັ້ມງວດປະຕິບັດຕາມແຈ້ງການແນະນໍາຂອງກົມພາສີ ສະບັບເລກທີ 7138.