ຫຼາຍມື້ມານີ້ ຝົນໂຮຍລົງມາບໍ່ຂາດສາຍໃນແຕ່ລະວັນ ເຮັດໃຫ້ຫຼາຍເຂດແຂວງແມ່ນໄປມາລຳບາກພໍສົມຄວນ ສະເພາະເຂົາຈຸດສຸມຊຽງໄຄ ເມືອງໄຊບູລີ ແຂວງສະຫວັນນະເຂດ ຫຼາຍບ້ານກຳລັງຖືກຕັດຂາດຈາກພາຍນອກເນື່ອງຈາກນ້ຳຖ້ວມຂັງຂົວຂ້າມທາງຫຼາຍຈຸດພາຍໃນເຂດ.
ດັ່ງນັ້ນ, ເພື່ອຢື້ຢາມຖາມຂ່າວ ແລະໃຫ້ການຊ່ວຍເຫຼືອພໍ່ແມ່ປະຊາຊົນ ໃນຕອນເຊົ້າຂອງວັນທີ 16 ກັນຍາ ປີ 2023 ນີ້ ທ່ານ ອ່ອນລໍາພັນ ບົວສີແກ້ວ ເຈົ້າເມືອງໄຊບູລີ ພ້ອມດ້ວຍ ຫົວໜ້າຫ້ອງວ່າການເມືອງ, ຫົວໜ້າຫ້ອງການ ຊັບພະຍາກອນທໍາມະຊາດ ແລະ ສິ່ງແວດລ້ອມເມືອງ, ຫົວໜ້າຫ້ອງການ ແຜນການ-ການລົງທຶນເມືອງ, ພ້ອມທີມງານ ໄດ້ລົງເຄື່ອນໄຫວ ຕິດຕາມ ກວດກາ ສະພາບນໍ້າຖ້ວມຢູ່ເສັ້ນທາງ PR 6308 ແຕ່ 3 ແຍກທາງເລກທີ 13 ໃຕ້ ບ້ານມະນີລາດ ຫາຈຸດສຸມຊຽງໄຄ ເມືອງໄຊບູລີ ແຂວງສະຫວັນນະເຂດ.
ເນື່ອງຈາກວ່າເຂດນີ້ ເປັນເຂດທີ່ມີພື້ນທີ່ຕໍ່າ ແລະ ຢູ່ລຽບຕາມແຄມເຊ, ປະກອບກັບມີຝົນຕົກຫຼາຍວັນຕິດຕໍ່ກັນ ເຮັດໃຫ້ລະດັບນໍ້າເຊບັ້ງໄຟ ແລະ ລະດັບນໍ້າເຊນ້ອຍ ເພີ່ມຂື້ນຢ່າງໄວວາ ເຮັດໃຫ້ເກີດມີນໍ້າຖ້ວມ ຂົວ ທັງໝົດ 3 ຈຸດ ຄື. ຂົວຫ້ວຍຕະບອງຮາບ, ຂົວຫ້ວຍຍາງ ແລະ ຂົວຫ້ວຍຂົວ. ຖ້ວມ ເສັ້ນທາງ 3 ຈຸດ ເຮັດໃຫ້ການຄົມມະນາຄົມ ເຂົ້າ-ອອກລະຫວ່າງບ້ານຕໍ່ບ້ານ ລະຫວ່າງບ້ານຫາເມືອງ ຂອງປະຊາຊົນທີ່ຢູ່ເຂດນີ້ 4 ບ້ານຄື: ບ້ານແກ້ງແວງ, ບ້ານຊຽງໄຄ, ບ້ານພູໂກະ ແລະ ບ້ານໜອງແວງ ພົບກັບຄວາມຫຍຸ້ງຍາກລໍາບາກຫຼາຍສົມຄວນ.
ຂ່າວຍັງແຈ້ງໃຫ້ຮູ້ຕື່ມອີກວ່າ ໃນ ເວລາ 16:00 ໂມງ ແລງ ຂອງວັນດຽວກັນ ລະດັບນໍ້າແມ່ນໍ້າເຊບັ້ງໄຟ ຢູ່ຈຸດວັດແທກນໍ້າ ບ້ານຕົ້ນແຫນ ຢູ່ທີ່ 13,40 ແມັດຖືວ່າສູງສົມຄວນ ຂະນະທີ່ເຂດອັນຕະລາຍ ຢູ່ທີ່ 14,50 ແມັດ ສະນັ້ນ ການນໍາເມືອງໄຊບູລີ ຈິ່ງແຈ້ງໃຫ້ປະຊາຊົນທີ່ຢູ່ລຽບຕາມແຄມແມ່ນໍ້າເຊບັ້ງໄຟ, ເຊນ້ອຍ ແລະ ເຂດທີ່ມີຄວາມສ່ຽງ ຈະຖືກຜົນກະທົບຈາກນໍ້າຖ້ວມໃຫ້ກະກຽມຍົກຍ້າຍສັດລ້ຽງ ແລະ ເຄື່ອງຂອງໄປໄວ້ໃນພື້ນທີ່ສູງ ແລະ ມີຄວາມປອດໄພ.
